Nō tēnei rā ka whakapuaki a Te Aka Whai Ora — te Mana Hauora Māori i te kopounga o ana Kaihautū ā-Rohe taupua tokowhā, mā rātou e ārahi, e tohutohu i ngā hiahia ā-rautaki o ngā hapori ā-rohe i roto i ngā whakahounga hauora hou.

Hei tā te Tumu Whakarae o Te Aka Whai Ora, a Riana Manuel, he tūranga matua ēnei hei āwhina i te huringa o te pūnaha hauora hei te ono marama e heke mai nei.

“Ka whakakaha ngā Kaihautū ā-Rohe taupua nei i ngā mahi me te raukaha ā-rohe, kia rite ai ngā rohe mō ngā nekehanga e matea ana mā tō tātau ahurea hauora hou.”

Ko ngā Kaihautū ā-Rohe taupua nei mō ia takiwā, ko:

  • Tracee Te Huia – Te Raki
  • Riki Nia Nia – Te Manawa Taki
  • Patrick Le Geyt – Te Puku
  • Mata Cherrington – Te Waipounamu.

E kī ana a Manuel, kua roa, kua whai hua hoki ngā hononga ki ō rātou ake rohe, ā, kei te whakapono ia ka whāia e rātau te huarahi e hāngai ana ki te kaupapa motuhake o ia rohe.

“Ka ārahi ngā Kaihautū ā-Rohe taupua nei i ngā mahi puta noa i ō rātau rohe me ō rātau hoa mahi ki roto i ngā hōhipera me ngā ratonga mātanga, te tiaki matua, te tiaki hapori me te hauora tūmatanui.”

Kua whakaū hoki a Te Aka Whai Ora i te kopounga o te Tākuta Rāwiri Jansen, kaihautū haumanu o mua i te Kāhui Hauora ā-Motu, hei Āpiha Hauora Matua taupua.

Hei tā Riana Manuel, ākuanei a Te Aka Whai Ora karangahia ai ngā Tono Whakamōhio Hiahia mō ngā tūranga Kaitohutohu Matua pūmau, tae atu ki te Āpiha Hauora Matua me ngā Kaitohutohu Matua mō te hunga Nēhi, Tapuhi Whakawhānau, Allied Health, me ngā Kaimanaaki.

“E rikarika ana mātau ki te kawe mai i ētahi kaimahi anō whai pūkenga, wheako me te manawanui ki te whai i ngā hua tautika mō Ngāi Māori puta noa i Aotearoa.”